Atvinnuleysistryggingasjóður

Tilkynning frá Greiðslustofu

Greiðslustofa verður lokuð á aðfangadag.
Atvinnuleysistryggingar verða greiddar út 31. desember og svo aftur 5. janúar þar sem bankar eru lokaðir 2. janúar. Allir sem eru nú þegar í greiðslukerfi atvinnuleysistrygginga fá greitt 31. desember. Þeir umsækjendur sem ekki eru orðnir virkir í greiðslukerfinu fá hins vegar greitt 5. janúar.

 

 

Skráð atvinnuleysi í nóvember 2008 var 3,3% eða að meðaltali 5.445 manns og eykst atvinnuleysi um 75% að meðaltali frá október eða um 2.339 manns.  Atvinnuleysi hefur ekki jafn mikið frá því í maí árið 2004. Á sama tíma á árinu 2007 var atvinnuleysi 0,8%, eða 1.321 manns. 

Á vef Fræðslumiðstöðvar atvinnulífsins hefur verið sett upp vefsvæði þar sem er að finna samantekt ýmissa gagnlegra upplýsinga og tengla um nám, námskeið, fræðslu og endurmenntun af ýmsu tagi og er ætlað að nýtast atvinnulausum nú þegar atvinnuleysi fer vaxandi og fá störf eru í boði.

Teknar hafa verið saman upplýsingar og leiðbeiningar vegna nýlegra breytinga (lög 131/2008) á lögum 54/2006 um atvinnuleysistryggingar, vegna minnkaðs starfshlutfalls launamanna. 

Verið er að vinna að leiðbeiningareglum vegna bótaréttar sjálfstætt starfandi þegar samdráttur verður í rekstri.

Blaðamannafundur verður haldinn á mánudaginn 24.nóvember í Þjóðmenningarhúsinu þar sem Félags- og tryggingamálaráðherra, Jóhanna Sigurðardóttir, mun afhenda styrki til atvinnumála kvenna.

Vinnumálastofnun og EURES-samevrópska vinnumiðlunin, standa fyrir Evrópskri starfakynningu í Ráðhúsi Reykjavíkur föstudaginn 21. nóvember frá kl. 17:00 til 21:00 og laugardaginn 22. nóvember frá kl. 12:00 til 18:00.

Alþingi hefur samþykkt lög um breytingu á lögum um atvinnuleysistryggingar annars vegar og lögum um Ábyrgðasjóð launa hins vegar. Breytingarnar á atvinnuleysistryggingalöggjöfinni snúa bæði að launþegum og sjálfstætt starfandi og gilda til 1. maí 2009.

Skráð atvinnuleysi í október 2008 var 1,9% eða að meðaltali 3.106 manns og eykst atvinnuleysi um 40% frá september eða um 877 manns.  Á sama tíma á árinu 2007 var atvinnuleysi 0,8%, eða 1.315 manns. 

Vinnumálastofnun mun á morgun, föstudaginn 31. október, opna fyrir rafræna umsókn um atvinnuleysisbætur. Unnið hefur verið að undirbúningi þess síðustu vikur og verður skráningarformið sett upp á vef stofnunarinnar til prufu á morgun. 

Ársfundur Vinnumálastofnunar verður haldinn á morgun, föstudaginn 31. október, á Hótel Hilton, 2. hæð og hefst kl. 13.

Margir hafa undrast af hverju atvinnulausum hefur fækkað síðustu daga skv. tölum í töflu á forsíðu á vef Vinnumálastofnunar. Ástæðan er fyrst og fremst tæknilegs eðlis og verður reynt að skýra það hér að neðan.

Vinnumálastofnun hefur breytt verklagi sínu við afgreiðslu umsókna um atvinnuleysisbætur í uppsagnarfresti vegna gjaldþrots fyrirtækis/félags.

Atvinnuleysið í septembermánuði var 1,3% og jókst úr 1,2% í ágúst. Að meðaltali voru 2.229 manns atvinnulausir og er það aðeins um 4% aukning frá í ágúst. Atvinnuleysi er nú mun meira en á sama tíma á árinu 2007, þegar það var 0,8%. Vegna samdráttar í efnahagslífinu er líklegt að atvinnuleysið í október muni aukast verulega og verða á bilinu 1,5 til 1,9% en mjög erfitt er að sjá fyrir þróun efnahags- og atvinnulífs og þar með hvernig atvinnuleysi muni þróast næstu vikur og mánuði.

Félags- og tryggingamálaráðuneytið hefur sett á fót nýtt samræmt þjónustu- og upplýsinganet vegna sérstakra aðstæðna á fjármálamarkaði. Um er að ræða nýtt vefsvæði, grænt símanúmer 800 1190, fyrirspurnalínu og netspjall.

Nú hefur Vinnumálastofnun/ Félagsmálaráðuneytið auglýst styrki til Atvinnumála kvenna lausa til umsóknar og er umsóknarfrestur til 28.september næstkomandi.  Til umráða nú eru 50 milljónir sem að verður úthlutað til kvenna sem hafa góðar viðskiptahugmyndir.

Afgreiðslutími allra þjónustuskrifstofa Vinnumálastofnunar um allt land verður frá og með 1. september 2008 frá kl. 9:00 til 15:00.

Skráð atvinnuleysi í júlí 2008 var 1,1% og voru að meðaltali 1.968 manns á atvinnuleysisskrá. Hlutfall atvinnuleysis er því óbreytt frá júní og er atvinnuleysi enn með minnsta móti. Hins vegar eru að jafnaði 126 fleiri atvinnulausir en í júní sem gerir um 7% aukningu. Árstíðabundin aukning vinnuafls hefur hins vegar áhrif á hlutfall atvinnuleysis á þriðja ársfjórðungi.  Atvinnuleysi er nú nokkru meira en á sama tíma fyrir ári þegar það var 0,9%.

Skráð atvinnuleysi í júní var 1,1% og eykst úr 1% í maí sl. Atvinnuleysið var 1% í júní í fyrra.

Að meðaltali voru 1.842 atvinnulausir í júní og fjölgar atvinnulausum um 103 eða um 6% frá maí.

 

 Þann 1. júní tók til starfa hjá Vinnumálastofnun Ásdís Guðmundsdóttir, félagsfræðingur og MS í stjórnun sem ráðgjafi og sérfræðingur í atvinnumálum kvenna. Verkefni hennar verður að sjá um Styrki til atvinnumála kvenna og þjónustu við þær konur sem hafa áhuga á að hasla sér völl sem sjálfstæðir atvinnurekendur.

Settar hafa verið inn nokkuð ítarlegar upplýsingar um hópuppsagnir undir samnefndan lið í veftrénu hér vinstra megin á síðunni. Er þar um að ræða leiðbeiningar til atvinnurekenda um hvernig þeir skuli haga málum þegar um hópuppsagnir er að ræða, eyðublað með tilkynningu til Vinnumálastofnunar um hópuppsögn, samantektar um þær tilkynningar sem borist hafa Vinnumálastofnun um hópuppsagnir á árinu 2008 og fleiri tengdar upplýsingar.

Skráð atvinnuleysi í maí 2008 var 1% og voru að jafnaði 1.739 manns á atvinnuleysisskrá, sem eru 22 fleiri en í apríl sl. Atvinnuleysishlutfallið er óbreytt frá því í síðasta mánuði og hefur raunar verið 1% frá áramótum. Í maímánuði í fyrra var atvinnuleysið 1,1%.

Vinnumálastofnun á Suðurlandi er lokuð í dag 30.05, vegna jarðskjálftanna.

Skráð atvinnuleysi í apríl 2008 var 1% eða að meðaltali 1.717 manns, sem eru 43 fleiri en í mars sl. eða rúmlega 2% aukning.  Atvinnuleysi er um 8% minna en á sama tíma fyrir ári þegar það var 1,1%. Sjá nánar í skýrslu um atvinnuástandið í apríl.

Vinnumálastofnun hefur tekið saman skýrslu um stöðu og horfur á vinnumarkaði á vormánuðum 2008. Í skýrslunni er litið á þróun atvinnuleysis og eftirspurnar eftir vinnuafli síðustu misseri ásamt spá um líklega þróun atvinnuleysis næstu 2 ár.

Skráð atvinnuleysi í mars 2008 var 1% og voru að meðaltali 1.674 manns á atvinnuleysisskrá í mánuðinum, sem eru 43 fleiri en í febrúar sl. eða 2,6% aukning. Atvinnuleysi er um 13% minna en á sama tíma fyrir ári þegar það var 1,3%. 

Atvinnuleysisbætur hækka frá og með 1. febrúar 2008 og verður mismunur hækkunarinnar greiddur atvinnulausum eigi síðar en 15. apríl.

Skráð atvinnuleysi í febrúar 2008 var 1% eða að meðaltali 1.631 manns, sem eru 86 fleiri en í janúar sl. eða um 5% aukning.  Atvinnuleysi er um 20% minna en á sama tíma fyrir ári þegar það var 1,3%. Atvinnuleysi eykst á höfuðborgarsvæðinu um 6% og er 0,7% eða sama og í janúar. Á landsbyggðinni eykst atvinnuleysi um 5% og er 1,6% en var 1,5% í janúar.  

Félags- og tryggingarmálaráðherra, Jóhanna Sigurðardóttir hefur úthlutað styrkjum til atvinnumála kvenna að upphæð kr. 15.790.000,- Styrkjunum er ætlað að styðja við bakið á konum sem hafa áhuga á að hasla sér völl sem sjálfstæðir atvinnurekendur og eru með áhugaverða viðskiptahugmynd. Að þessu sinni var um að ræða aukaúthlutun styrkja til atvinnumála kvenna fyrir árið 2007 vegna mótvægisaðgerða ríkisstjórnarinnar og því mestu úthlutað til kvenna á landsbyggðinni. 

Skráð atvinnuleysi í janúar 2008 var 1% eða að meðaltali 1.545 manns, sem eru 188 fleiri en í desember sl. eða um 14% aukning.  Atvinnuleysi er um 22% minna en á sama tíma fyrir ári þegar það var 1,3%. Atvinnuleysi eykst á höfuðborgarsvæðinu um 12% og er 0,7% en 0,6% í desember.  Á landsbyggðinni eykst atvinnuleysi meira eða um 16% og er 1,5% en 1,2% í desember.  

Skráð atvinnuleysi í desember 2007 var 0,8% eða að meðaltali 1.357 manns, sem eru 36 fleiri en í nóvember sl. eða 2,6% aukning.  Atvinnuleysi er um 28% minna en á sama tíma fyrir ári þegar það var 1,2%.