Fréttir vinnumálastofnunar

Vinnumálastofnun hefur tekið saman skýrslu um horfur á vinnumarkaði næstu mánuði. Megin niðurstöður samantektarinnar er að atvinnuleysi muni hækka nokkuð hratt næstu 2-3 mánuði og fara í ríflega 7% í janúar og yfir 8% í febrúar. Eftir það mun atvinnuleysi aukast hægar og fara í 9-10% á vormánuðum. Hæst fari atvinnuleysi í maí samhliða því að námsmenn koma út á vinnumarkaðinn og eigi erfitt með að fá störf. Atvinnuleysi fer svo lækkandi í júní og búast megi við að það lækki áfram fram í september í takt við hefðbundna árstíðarsveiflu. Erfitt er þó að spá fyrir um hversu mikil sú lækkun verður, en reiknað er með að meðalatvinnuleysi ársins 2009 verði á bilinu 7-9%.

Til að bregðast við auknu álagi á þjónustuskrifstofu Vinnumálastofnunar að Engjateigi 11 og bæta þjónustu stofnunarinnar, mun Vinnumálastofnun þann 2. janúar n.k. opna til viðbótar aðra þjónustuskrifstofu að Borgarnúni 7B.

Þar verður EURES, evrópska vinnumiðlunin til staðar og þar með öll þjónusta við atvinnuleitendur og atvinnuleysisbótaþega sem ekki tala íslensku. Einnig er þar veitt öll almenn ráðgjöf vegna atvinnuleitar erlendis.

Íslensk stjórnvöld hafa ákveðið að framlengja heimild er setur skorður á frjálsa för ríkisborgara frá Rúmeníu og Búlgaríu til atvinnuþátttöku hér á landi til ársins 2012. Atvinnuþátttaka þeirra á íslenskum vinnumarkaði verður því áfram háð dvalar- og atvinnuleyfum.

Skráð atvinnuleysi í nóvember 2008 var 3,3% eða að meðaltali 5.445 manns og eykst atvinnuleysi um 75% að meðaltali frá október eða um 2.339 manns.  Atvinnuleysi hefur ekki jafn mikið frá því í maí árið 2004. Á sama tíma á árinu 2007 var atvinnuleysi 0,8%, eða 1.321 manns. 

Á vef Fræðslumiðstöðvar atvinnulífsins hefur verið sett upp vefsvæði þar sem er að finna samantekt ýmissa gagnlegra upplýsinga og tengla um nám, námskeið, fræðslu og endurmenntun af ýmsu tagi og er ætlað að nýtast atvinnulausum nú þegar atvinnuleysi fer vaxandi og fá störf eru í boði.

Í nóvembermánuði bárust Vinnumálastofnun 12 tilkynningar um hópuppsagnir þar sem sagt var upp samtals um 560 manns. Um 43% tilkynninganna komu úr verslun, flutningum og tengdum greinum. Um 33% voru vegna starfsmanna í mannvirkjagerð og tengdum iðnaði og um fjórðungur úr sérfræðilegri þjónustu og upplýsinga- og útgáfustarfsemi.

Íslensk stjórnvöld hafa sett sér það markmið að hafa innleitt þjónustutilskipun ESB í íslensk lög fyrir árslok 2009. Markmið tilskipunarinnar er að tryggja betur frjáls þjónustuviðskipti í Evrópu. Af þessu tilefni efna Samtök atvinnulífsins til morgunfundar á Grand Hótel Reykjavík, föstudaginn 28. nóvember, kl. 8:30-10:00.

Föstudaginn 28. nóvember verður hádegisfyrirlestur um fjarvinnu á vegum Rannsóknastofu í vinnuvernd. Fyrirlesari er Tryggvi R. Jónsson, MA í mannauðsstjórnun við viðskiptadeild HÍ og ber fyrirlesturinn heitið Fjarvinna - ávinningur eða ánauð? Fyrirlesturinn verður haldinn í Háskóla Íslands, Odda, stofu 101 kl. 12-13.

Jóhanna Sigurðardóttir, félags- og tryggingamálaráðherra, afhenti í gær styrki til atvinnumála kvenna við athöfn sem fór fram í Þjóðmenningarhúsinu. Fimmtíu milljónir króna voru til úthlutunar að þessu sinni og voru veittir 56 styrkir. Umsóknir sem bárust voru 246 talsins hvaðanæva af landinu.

Verkefnisstjórn um stöðu miðaldra og eldra fólks á vinnumarkaði heldur morgunvarðarfund þar sem kynntar verða tvær mastersritgerðir sem tengjast stöðu þessa aldurshóps á vinnumarkaði, en verkefnisstjórnin hefur lagt áherslu á rannsóknir í starfi sínu. Þá vekur núverandi staða í efnahags- og atvinnumálum þjóðarinnar upp ýmsar spurningar um stöðu hópsins og munu þrír frummælendur fjalla um sérstöðu hópsins í þróun og ástandi samtímans. Morgunverðarfundurinn verður haldinn miðvikudaginn 19. nóvember 2008 kl. 8.30 -10:00 á Grand hóteli í Reykjavík, salur Háteigur B.

Vinnumálastofnun og EURES-samevrópska vinnumiðlunin, standa fyrir Evrópskri starfakynningu í Ráðhúsi Reykjavíkur föstudaginn 21. nóvember frá kl. 17:00 til 21:00 og laugardaginn 22. nóvember frá kl. 12:00 til 18:00.

Alþingi hefur samþykkt lög um breytingu á lögum um atvinnuleysistryggingar annars vegar og lögum um Ábyrgðasjóð launa hins vegar. Breytingarnar á atvinnuleysistryggingalöggjöfinni snúa bæði að launþegum og sjálfstætt starfandi og gilda til 1. maí 2009.

Starfsmenntaverðlaunin voru afhent í níunda sinn föstudaginn 7. nóvember síðastliðinn. Forseti Íslands hr. Ólafur Ragnar Grímsson afhenti verðlaunin en þau hlutu: Samskip hf. í flokki fyrirtækja og Fræðslusetrið Starfsmenn í flokki skóla og fræðsluaðila, vegna verkefnisins Járnsíða sem unnið er í samstarfi við Sýslumannafélag Íslands.

Skráð atvinnuleysi í október 2008 var 1,9% eða að meðaltali 3.106 manns og eykst atvinnuleysi um 40% frá september eða um 877 manns.  Á sama tíma á árinu 2007 var atvinnuleysi 0,8%, eða 1.315 manns. 

Alþjóðahús, í samvinnu við mannréttindaskrifstofu Reykjavíkurborgar, heldur málþing um atvinnumál útlendinga á Íslandi í Tjarnarsal Ráðhúss Reykjavíkur fimmtudaginn 6. nóvember 2008 frá kl. 13 til 17.

Ársfundur Vinnumálastofnunar var haldinn föstudaginn 31. október síðast liðinn. Ársskýrslu Vinnumálastofnunar var dreift á fundinum. Hrannar B. Arnarsson, stjórnarformaður Vinnumálastofnunar setti fundinn og bauð fundarmenn velkomna. 

Í októbermánuði bárust Vinnumálastofnun 65 tilkynningar um hópuppsagnir þar sem sagt var upp samtals um 2.950 manns. Um 46% tilkynninganna voru vegna starfsmanna í mannvirkjagerð. Uppsagnir í fjármálastarfsemi, þar sem uppsagnir Landsbanka, Glitnis og Kaupþings vega þyngst, eru um 20% af tilkynningunum. Tæp 14% uppsagnanna koma úr verslunargeiranum og um 11% úr iðnaði, í flestum tilvikum tengdur mannvirkjagerð. Um 4% uppsagna er í sérfræðistarfsemi og útgáfustarfsemi og tæp 4% uppsagnanna eru úr flutningastarfsemi þar sem póstdreifing vegur þyngst. Loks voru 1% uppsagna úr ýmiskonar þjónustu.

Vinnumálastofnun mun á morgun, föstudaginn 31. október, opna fyrir rafræna umsókn um atvinnuleysisbætur. Unnið hefur verið að undirbúningi þess síðustu vikur og verður skráningarformið sett upp á vef stofnunarinnar til prufu á morgun. 

Ársfundur Vinnumálastofnunar verður haldinn á morgun, föstudaginn 31. október, á Hótel Hilton, 2. hæð og hefst kl. 13.

Margir hafa undrast af hverju atvinnulausum hefur fækkað síðustu daga skv. tölum í töflu á forsíðu á vef Vinnumálastofnunar. Ástæðan er fyrst og fremst tæknilegs eðlis og verður reynt að skýra það hér að neðan.

Vegna þess ástands sem nú ríkir á vinnumarkaðnum býður Rannóknastofa í vinnuvernd upp á hádegisfyrirlestur miðvikudaginn 29. október nk. kl. 12:30-13:15. Þar mun Gylfi Dalmann Aðalsteinsson, dósent við viðskiptafræðideild HÍ fjalla um uppsagnir út frá sjónarmiði mannauðsstjórnunar.

Verkefni næstu missera eru skýr og snúast um að koma á stöðugleika, forða fjöldagjaldþrotum og stórauknu atvinnuleysi og tryggja að heimili fólks verði varin eins og kostur er. Þetta sagði Jóhanna Sigurðardóttir, félags- og tryggingamálaráðherra, á ársfundi Alþýðusambands Íslands sem nú stendur yfir.

Mánudaginn 27. október heldur Rannsóknarstofa í vinnuvernd morgunverðarfund sem ber yfirskriftina Launamismunun - hvað gerist nú? Fundurinn er haldinn á Grand Hótel - Hvammi, og stendur frá 8:30 til 10.

BHM heldur ráðstefnum fimmtudaginn 23. október nk. í tilefni af 50 ára afmæli bandalagsins. Ráðstefnan nefnist Farseðill til framtíðar - Málþing um menntun og er haldin á Grand hóteli Reykjavík, gyllta salnum, 23. október kl. 13-16. 

Samtök atvinnulífsins gerðu nýlega könnun meðal sinna aðildarfyrirtækja um uppsagna- og ráðningaráform. Meginniðurstaðan er að horfur á vinnumarkaði hafa versnað töluvert frá því fyrr á árinu, en um helmingur fyrirtækja hefur þó ekki sagt upp starfsfólki né hyggur á uppsagnir á þessu ári.

Vinnueftirlit ríkisins stendur fyrir ráðstefnu um bætt vinnuumhverfi í tilefni af evrópsku vinnuverndarvikunni. Ráðstefnan ber heitið Bætt vinnuumhverfi - betra líf og verður haldin á Grand Hóteli, í Gullteigi, þriðjudaginn 21. október kl. 13-16.

Þór Sigfússon, formaður Samtaka atvinnulífsins, hvetur forsvarsmenn fyrirtækja til að bjóða fólki hlutastörf í stað þess að segja því upp, ef tök eru á. Þetta kemur fram í frétt á vef Samtaka atvinnulífsins.

Tryggt verður að þeir starfsmenn bankanna, sem sagt verður upp störfum eftir yfirtöku Fjármálaeftirlitsins á rekstri þeirra, muni fá greidd laun út lögboðinn uppsagnarfrest. Þetta kom fram í máli Björgvins G. Sigurðssonar viðskiptaráðherra á blaðamannafundi fyrr í dag.

Atvinnuleysið í septembermánuði var 1,3% og jókst úr 1,2% í ágúst. Að meðaltali voru 2.229 manns atvinnulausir og er það aðeins um 4% aukning frá í ágúst. Atvinnuleysi er nú mun meira en á sama tíma á árinu 2007, þegar það var 0,8%. Vegna samdráttar í efnahagslífinu er líklegt að atvinnuleysið í október muni aukast verulega og verða á bilinu 1,5 til 1,9% en mjög erfitt er að sjá fyrir þróun efnahags- og atvinnulífs og þar með hvernig atvinnuleysi muni þróast næstu vikur og mánuði.

Félags- og tryggingamálaráðuneytið hefur sett á fót nýtt samræmt þjónustu- og upplýsinganet vegna sérstakra aðstæðna á fjármálamarkaði. Um er að ræða nýtt vefsvæði, grænt símanúmer 800 1190, fyrirspurnalínu og netspjall.

Vinnumálastofnun ásamt Rannsókna- og þróunarmiðstöð Háskólans á Akureyri hefur ýtt úr vör netkönnun þar sem spurt er um sæmramingu atvinnu og einkalífs. Fjöldi fyrirtækja hefur nú þegar fengið spurningalista með tölvupósti og biðjum við talsmenn fyrirtækja að taka umleitan okkar vel og svara þessum fáu spurningum sem lagðar eru fyrir. Surningalistakönnunin er aðeins einn liður í stærri rannsókn sem unnin er að innan stofnunarinnar.

Í septembermánuði bárust Vinnumálastofnun fjórar tilkynningar um hópuppsagnir. Allt voru það tilkynningar frá fyrirtækjum í byggingariðnaði, starfandi á höfuðborgarsvæðinu. Alls var tilkynnt um uppsagnir á 113 starfsmönnum, en heildarfjöldi starfsmanna þessara fyrirtækja er um 430 og er því um fjórðungi starfsmanna sagt upp að jafnaði.

Ómar H. Kristmundsson, dósent í stjórnmálafræði við Háskóla Íslands, heldur fyrirlestur föstudaginn 3. október nk. sem hann nefnir "Er gagn af starfsmannastefnum ríkisstofnana?". Fyrirlesturinn er haldinn í Háskóla Íslands, Odda, stofu 101 kl. 12-13.

Málþingið sem haldið var í Ketilshúsinu á Akureyri tókst mjög vel. Erindi voru fróðleg og málin mikið rædd. Jóhanna Sigurðardóttir félags- og tryggingamálaráðherra byrjaði með erindi þar sem hún kom meðal annars inn á  einstaka stöðu Íslands hvað varðaði atvinnuþátttöku þeirra sem eru eldri en 50 ára. Hún talaði um að með þessu fólki byggi mikilvæg lífsreynsla og starfsorka sem bætt gæti samfélagið og stutt það áfram í síbreytileika nútíma vinnumarkaðar.

Verklag vegna birtingar upplýsinga um hópuppsagnir sem berast Vinnumálastofnun verður framvegis þannig að 2. virka dag hvers mánaðar, kl. 14 verður á heimasíðu stofnunarinnar, www.vinnumalastofnun.is, birt samantekt um þær hópuppsagnir sem borist hafa stofnuninni mánuðinn á undan.

Á kynningarfundi um styrki til atvinnumála kvenna að Kjarvalsstöðum í hádeginu opnaði Félags- og tryggingamálaráðherra, Jóhann Sigurðardóttir, heimasíðu Atvinnumála kvenna, www.atvinnumalkvenna.is. Í ávarpi hennar kom fram að rúmlega 330 konur hafa fengið styrki til margvíslegra verkefna á undanförnum árum. Styrkurinn hafi orðið þeim hvatning og stuðningur til uppbyggingar á fyrirtækjum þeirra.

Geta eldri starfsmenn verið lykillinn að velgengni fyrirtækja? Leitað verður svara við þessari spurningu á málþingi á vegum Verkefnisstjórnar 50+ í Ketilhúsi á Akureyri fimmtudaginn 25. september 2008 kl. 13:00 - 16:00.

Hádegisfyrirlestrar Rannsóknastofu í vinnuvernd á haustmisseri eru nú að fara í gang og er fyrsti fyrirlesturinn þann 19. september nk. þar sem Ásta Snorradóttir félagsfræðingur hjá Vinnueftirlitinu flytur erindi sem hún nefnir Konur, örorka og hindranir á vinnumarkaði. Fyrirlestrarnir verða haldnir annan hvern föstudag kl. 12.00 - 13.00 í stofu 101 í Odda.

 

Skráð atvinnuleysi í ágúst 2008 var 1,2% eða að meðaltali 2.136 manns og eykst atvinnuleysi um tæp 9% að meðaltali frá júlí eða um 168 manns.  Á sama tíma á árinu 2007 var atvinnuleysi 0,9% eða 1.476 manns og hefur því aukist talsvert frá því sem það var með minnsta móti í fyrra.

Sjá nánar skýrslu um atvinnuástand í ágúst 2008

Nú hefur Vinnumálastofnun/ Félagsmálaráðuneytið auglýst styrki til Atvinnumála kvenna lausa til umsóknar og er umsóknarfrestur til 28.september næstkomandi.  Til umráða nú eru 50 milljónir sem að verður úthlutað til kvenna sem hafa góðar viðskiptahugmyndir.

Skráð atvinnuleysi í júlí 2008 var 1,1% og voru að meðaltali 1.968 manns á atvinnuleysisskrá. Hlutfall atvinnuleysis er því óbreytt frá júní og er atvinnuleysi enn með minnsta móti. Hins vegar eru að jafnaði 126 fleiri atvinnulausir en í júní sem gerir um 7% aukningu. Árstíðabundin aukning vinnuafls hefur hins vegar áhrif á hlutfall atvinnuleysis á þriðja ársfjórðungi.  Atvinnuleysi er nú nokkru meira en á sama tíma fyrir ári þegar það var 0,9%.

Föstudaginn 1. ágúst n. k. taka gildi breytingar á lögum nr. 97/2002 um atvinnuréttindi útlendinga.

Skráð atvinnuleysi í júní var 1,1% og eykst úr 1% í maí sl. Atvinnuleysið var 1% í júní í fyrra.

Að meðaltali voru 1.842 atvinnulausir í júní og fjölgar atvinnulausum um 103 eða um 6% frá maí.

 

Tvær tilkynningar um hópuppsagnir bárust Vinnumálastofnun í júnímánuði. Eins og fram hefur komið í fréttum eru erfiðleikar framundan í flugrekstri og snúa bæði tilvikin að flugi og flugþjónustu. Hér er um það að ræða að um það bil 300 manns missi vinnuna og áætlað að um 1/3 eða nálægt 100 þeirra sem sagt er upp búi á Suðurnesjum þar sem atvinnuleysi mælist mest á landsvísu. Þessar uppsagnir koma því sérstaklega þungt niður á Suðurnesjum.

Atvinnuleysi hefur verið um 1% frá áramótum. Töluverð aukning varð þó á meðalfjölda á atvinnuleysisskrá á milli mánaða eða úr 1.739 í maí, í 2.300 í júní. Því má búast við að atvinnuleysi í júní mælist hærra en í fyrri mánuði og verði um 1,2%. Aukning atvinnuleysis nú síðustu vikur er nánast eingöngu á höfuðborgarsvæðinu og fer þar líkast til úr 0,8% í maí í 1,1% í júní, en helst nánast óbreytt á landsbyggðinni eða 1,4%. Aukningin er heldur meiri meðal kvenna.

Settar hafa verið inn nokkuð ítarlegar upplýsingar um hópuppsagnir undir samnefndan lið í veftrénu hér vinstra megin á síðunni. Er þar um að ræða leiðbeiningar til atvinnurekenda um hvernig þeir skuli haga málum þegar um hópuppsagnir er að ræða, eyðublað með tilkynningu til Vinnumálastofnunar um hópuppsögn, samantektar um þær tilkynningar sem borist hafa Vinnumálastofnun um hópuppsagnir á árinu 2008 og fleiri tengdar upplýsingar.

Skráð atvinnuleysi í maí 2008 var 1% og voru að jafnaði 1.739 manns á atvinnuleysisskrá, sem eru 22 fleiri en í apríl sl. Atvinnuleysishlutfallið er óbreytt frá því í síðasta mánuði og hefur raunar verið 1% frá áramótum. Í maímánuði í fyrra var atvinnuleysið 1,1%.

EES-vinnumiðlun (EURES) á Íslandi stóð fyrir ráðstefnu föstudaginn 30. maí sl. þar sem fjallað var um um fyrirséðan skort á sérfræðingum og samkeppni um hæfasta fólkið á EES-svæðinu. Enn fremur markaði ráðstefnan  upphaf samstarfs EURES á Íslandi, Noregi, Írlandi og Danmörku um aðgerðir til að laða til landana sérhæft starfsfólk.

Öll erindi ráðstefnunar er að finna á heimasíðu Eures á Íslandi, Eures.is 

Samevrópsk  rannsókn
Vinnumálastofnun tekur nú  þátt í samevrópskri rannsókn um samþættingu fjölskyldu og atvinnulífs. Rannóknin er gerð að frumkvæði vinnumálastofnunarinnar á Möltu en þátttakendur í rannsókninni eru frá sex löndum, Möltu, Kípur, Sloveníu, Ítalíu, Svíþjóð og Íslandi. Tilgangur rannsóknarinnar er að greina hugsanlegt hlutverk hins opinbera í samþættingu fjölskyldu og atvinnulífs. 

Framtíðarhorfur á Evrópskum vinnumarkaði - Baráttan um besta fólkið.

Skráð atvinnuleysi í apríl 2008 var 1% eða að meðaltali 1.717 manns, sem eru 43 fleiri en í mars sl. eða rúmlega 2% aukning.  Atvinnuleysi er um 8% minna en á sama tíma fyrir ári þegar það var 1,1%. Sjá nánar í skýrslu um atvinnuástandið í apríl.

Vinnumálastofnun hefur tekið saman skýrslu um stöðu og horfur á vinnumarkaði á vormánuðum 2008. Í skýrslunni er litið á þróun atvinnuleysis og eftirspurnar eftir vinnuafli síðustu misseri ásamt spá um líklega þróun atvinnuleysis næstu 2 ár.

Skráð atvinnuleysi í mars 2008 var 1% og voru að meðaltali 1.674 manns á atvinnuleysisskrá í mánuðinum, sem eru 43 fleiri en í febrúar sl. eða 2,6% aukning. Atvinnuleysi er um 13% minna en á sama tíma fyrir ári þegar það var 1,3%. 

Auðveldar sveigjanleiki í starfi samspil fjölskyldu og atvinnulífs, eða eykur sveigjanleikinn álagið á fjölskylduna? Þetta er meðal þess sem Ingibjörg Lilja Ómarsdóttir fjallar um í fyrirlestri sem hún heldur á vegum Rannsóknastofu í vinnuvernd föstudaginn 28. mars. Fyrirlesturinn verður í Háskóla Íslands, Odda, stofu 101 kl. 12.15 – 13.15.

Skráð atvinnuleysi í febrúar 2008 var 1% eða að meðaltali 1.631 manns, sem eru 86 fleiri en í janúar sl. eða um 5% aukning.  Atvinnuleysi er um 20% minna en á sama tíma fyrir ári þegar það var 1,3%. Atvinnuleysi eykst á höfuðborgarsvæðinu um 6% og er 0,7% eða sama og í janúar. Á landsbyggðinni eykst atvinnuleysi um 5% og er 1,6% en var 1,5% í janúar.  

Félags- og tryggingarmálaráðherra, Jóhanna Sigurðardóttir hefur úthlutað styrkjum til atvinnumála kvenna að upphæð kr. 15.790.000,- Styrkjunum er ætlað að styðja við bakið á konum sem hafa áhuga á að hasla sér völl sem sjálfstæðir atvinnurekendur og eru með áhugaverða viðskiptahugmynd. Að þessu sinni var um að ræða aukaúthlutun styrkja til atvinnumála kvenna fyrir árið 2007 vegna mótvægisaðgerða ríkisstjórnarinnar og því mestu úthlutað til kvenna á landsbyggðinni. 

Skráð atvinnuleysi í janúar 2008 var 1% eða að meðaltali 1.545 manns, sem eru 188 fleiri en í desember sl. eða um 14% aukning.  Atvinnuleysi er um 22% minna en á sama tíma fyrir ári þegar það var 1,3%. Atvinnuleysi eykst á höfuðborgarsvæðinu um 12% og er 0,7% en 0,6% í desember.  Á landsbyggðinni eykst atvinnuleysi meira eða um 16% og er 1,5% en 1,2% í desember.  

Samspil hljóðhönnunar og menningar á vinnustað, nefnist fyrirlestur sem Ólafur Hjálmarsson, verkfræðingur hjá Trivium ráðgjöf ehf. heldur í boði Rannsóknastofu í vinnuvernd, föstudaginn  8. febrúar kl. 12.15 – 13.15. Fyrirlesturinn verður í Háskóla Íslands, Odda, stofu 101.

Stefán Ólafsson, prófessor í félagsfræði í Háskóla Íslands, mun fjalla um umfang vinnu í lífi Íslendinga í samanburði við aðrar þjóðir í hádegisfyrirlestri í stofu 101 í Odda föstudaginn 25. janúar n.k. kl. 12:15-13:15.

Starfsmenntaráð heldur opinn fund um áherslur næsta árs fimmtudaginn 17. janúar nk. kl. 12:15-14:30 í húsakynnum Þekkingarseturs Þingeyinga, Garðarsbraut 19, Húsavík.

Skráð atvinnuleysi í desember 2007 var 0,8% eða að meðaltali 1.357 manns, sem eru 36 fleiri en í nóvember sl. eða 2,6% aukning.  Atvinnuleysi er um 28% minna en á sama tíma fyrir ári þegar það var 1,2%.

Félagsmálaráðuneytið og innflytjendaráð standa fyrir málþingi um framkvæmdaáætlun í málefnum innflytjenda sem haldið verður föstudaginn 11. janúar 2008 klukkan 10–16.30 í Borgartúni 6 í Reykjavík. Með því vill innflytjendaráð kalla eftir sjónarmiðum og hugmyndum við gerð framkvæmdaáætlunar í málefnum innflytjenda.