Skilyrði fyrir námssamningi 1 

• Atvinnuleitandi skal eiga sex mánaða samfellda vinnusögu áður en hann sótti um atvinnuleysisbætur. Þar af er heimilt að taka tillit til þess hafi atvinnuleitandi verið í allt að þrjá mánuði á atvinnuleysisbótum á því tímabili. Heimilt er að gera námssamning 1 við atvinnuleitanda í eina önn með möguleika á framlengingu í aðra. Hámark tvær annir
• Ráðgjafi Vinnumálastofnunar telur ekki líklegt að atvinnuleitanda verði boðið starf á næstu vikum
• Skilyrði er að námið kunni að nýtast atvinnuleitandanum við atvinnuleit að námi loknu að mati ráðgjafa Vinnumálastofnunar
• Sérstakur námssamningur 1 er gerður milli Vinnumálastofnunar og atvinnuleitanda þar sem atvinnuleitandi skuldbindur sig til að stunda námið að fullu, þar á meðal uppfylla skilyrði um mætingu sem sett eru um námið og önnur skilyrði um reglulega ástundun þess
• Atvinnuleitandi er undanþeginn virkri atvinnuleit á sama tíma
• Jafnframt skuldbindur atvinnuleitandi sig að hafa regluleg samskipti við ráðgjafa Vinnumálastofnunar meðan á gildistíma námssamnings stendur. Ráðgjafi kallar til sín atvinnuleitanda a.m.k. einu sinni á önn og við lok náms
• Skilyrði er að námið sé ekki lánshæft hjá Lánasjóði íslenskra námsmanna, hvort sem um er að ræða dag- eða kvöldskóla eða fjarnám
• Ekki er heimilt að gera námssamning vegna náms á námsbrautum sem leiða til stúdentsprófs hjá framhaldsskólum. Þó er ráðgjöfum Vinnumálastofnunar heimilt að samþykkja slíkt nám sem vinnumarkaðsúrræði þegar sérstaklega stendur á. Skilyrði þess er að fyrir ákvörðuninni liggi gild rök að mati ráðgjafa of að atvinnuleitandi hafi ekki verið skráður í framhaldsskóla á síðustu tólf mánuðum

Dæmi um nám sem stunda má á námssamningi 1:

• Grunndeildir iðn- og verknáms í framhaldsskólum (sá hluti námsins sem ekki er lánshæfur)
• Háskólastoðir (undirbúningsnám fyrir háskólanám)
• Námsleiðir Fræðslumiðstöðvar atvinnulífsins á vegum símenntunarmiðstöðva s.s. Aftur í nám, Grunnmenntaskólinn o.fl.
• Frumgreinanám á háskólastigi, sá hluti námsins sem ekki er lánshæfur
• Námskeið á vegum starfsendurhæfingarmiðstöðva s.s. Hringsjá
• Ekki er gerður samningur um Háskólabrú (lánshæft nám)

Skilyrði fyrir námssamningi 2 

• Vinnumálastofnun er heimilt að gera sérstakan námssamning 2 vegna námskeiða við atvinnuleitanda sem er tryggður innan atvinnuleysistryggingakerfisins
• Atvinnuleitandi skal vera í virkri atvinnuleit á sama tíma og skal hann jafnframt vera í reglulegum samskiptum við ráðgjafa Vinnumálastofnunar
• Atvinnuleitandi skal eiga sex mánaða samfellda vinnusögu áður en hann sótti um atvinnuleysisbætur. Þar af er heimilt að taka tillit til þess hafi atvinnuleitandi verið í allt að þrjá mánuði á atvinnuleysisbótum á því tímabili
• Skilyrði er að námið kunni að nýtast atvinnuleitandanum við atvinnuleit að námi loknu að mati ráðgjafa Vinnumálastofnunar

Dæmi um nám sem stunda má á námssamningi 2:

• Kvöld- og fjarnám á framhaldsskólastigi sem nemur að hámarki níu einingum
• Námskeið á vegum fræðslustofnana atvinnulífins, einkaskóla, endurmenntunarstofnana (nám sem ekki er einingabært) og nýsköpunarmiðstöðva

Sjálfstætt starfandi einstaklingur sem er samþykkur á bráðabirgðaákvæði 26. gr. laga nr. 54/2006 um breytingar á lögum um atvinnuleysistryggingar, á ekki rétt á námssamningi.

Atvinnuleitandi sem fellur undir bráðabirgðaákvæði um minnkað starfshlutfall sbr. 25. gr. laga nr. 54/2006 á rétt á námssamningi.

Undanþágur vegna háskólanáms

Heimilt er að stund nám á háskólastigi sem nemur að hámarki 10 ECTS háskólaeiningum á námsönn hvort sem um er að ræða nám í háskólum eða á vegum endurmenntunarstofnana háskólastigsins. Atvinnuleitandi skal vera í virkri atvinnuleit samhliða námi og upplýsa Vinnumálastofnun um námið. Atvinnuleitandi má ekki vera að koma úr námi. Vinnumálastofnun getur við sérstakar aðstæður veitt heimild til náms sem nemur allt að 20 ECTS háskólaeiningum. Er þá gerður við atvinnuleitanda námssamningur 2.

Skilyrði fyrir slíkri undanþágu:

• Námið sé ekki lánshæft
• Nýtist hinum tryggða beint við atvinnuleit
• Atvinnuleysisbætur skerðast í samræmi við umfang náms. Sjá meðfylgjandi töflu
• Atvinnuleitandi sé að koma af vinnumarkaði
• Leggja þarf fram staðfestingu frá skóla um einingafjölda

ECTS einingar                                    Skerðingarhlutfall                                                   

Námsstyrkur Vinnumálastofnunar

Leiðbeiningar þessar eiga við um sjálfvalin námskeið - ekki þau sem eru skylduvirkni.  Skylduvirkninámskeiðin eru greidd 100% af VMST.

Vinnumálastofnun er heimilt að styrkja atvinnuleitanda sem er tryggður innan atvinnuleysistryggingakerfisins vegna þátttöku hans í starfstengdu námi eða námskeiði sem viðurkennt er sem vinnumarkaðsúrræði. Styrkurinn er háður því skilyrði að ráðgjafi meti að hið starfstengda nám eða námskeið komi til með að nýtast atvinnuleitandanum beint við atvinnuleit og til þess fallið að skila honum árangri við að finna sér starf.

Atvinnuleitandi getur valið að fara á námskeið á vegum VMST sem greitt er að fullu eða námskeið sem hann velur að eigin frumkvæði og fær þá námsstyrk til að greiða hluta af námskeiðsgjaldi.   Ekki er mögulegt að nýta sér hvoru tveggja að fara á námskeið og sækja um námsstyrk á sömu önninni, velur á milli og getur einungis fengið eitt úrræði  á önn. 

Bótaréttur viðkomandi skiptir ekki máli og undir þessar reglur falla einnig sjálftætt starfandi á eigin kt. (eftir 3 mánuði). 

Atvinnuleitendur í lækkuðu starfshlutfalli hafa ekki þennan rétt ef þeir eru komnir inn vegna samdráttar (er í 50% - 80% starfi) enda er litið á lækkað starfshlutfall sem vinnumarkaðsúrræði. 

Styrkurinn skal að hámarki nema 50% af heildar námskeiðsgjaldi en þó aldrei hærri en 70.000 kr. á önn eða á hverjum þrettán vikum.  Þetta á við þegar atvinnuleitandi hefur ekki nýtt námskeið eða önnur úrræði á vegum VMST á þessari sömu önn sem um ræðir.   Styrkurinn reiknast ekki í hlutfalli af bótarétti.  Einstaklingur sem er tryggður í atvinnuleysistryggingakerfinu  á rétt á vinnumarkaðsúrræðum óháð bótarétti. Undantekning er eins og áður segir það fólk sem fellur undir minnkað starfshlutfall vegna samdráttar í rekstri atvinnurekanda.

Atvinnuleitanda skal bent á rétt sinn hjá stéttarfélagi en ekki er gerð krafa um að hann sé nýttur.

*Í einstaka tilvikum getur Vinnumálstofnun greitt hærri styrk en sem nemur 50% s.s. ef Vinnumálastofnun getur ekki boðið upp á námskeið á eigin vegum vegna fámennis á dreifbýlum svæðum og kaupir því stakt námskeiðspláss fyrir atvinnuleitanda hjá námskeiðshaldara.

Umsóknum berist náms- og starfsráðgjöfum VMST.

Meðfylgjandi gögn fylgi umsókn: 

• I. Námslýsing frá skóla/námskeiðshaldara (auk upplýsinga um staðsetningu náms og nafn

         fræðslustofnunar).

• II. Námskostnaður (sundurliðaður ef annar er námskeiðsgjöld).
• III. Lengd náms, tímasetning og fjöldi kennslustunda.

Umsækjandi þarf að hafa verið á atvinnuleysisbótum í a.m.k. einn mánuð áður en hann ávinnur sér réttindi til námsstyrkjar.

Umsókn um námsstyrk þarf að liggja fyrir a.m.k. 5 virkum dögum fyrir upphaf námskeiðs til að unnt sé að afgreiða umsóknina áður en námskeiðið hefst.

Greiðslur

Námsskeiðshaldari sendir reikning til þjónustuskrifstofu VMST fyrir þeirri upphæð sem VMST á að borga.

Með skulu fylgja upplýsingar um heildarkostnað námskeiðs frá námskeiðshaldara s.s. upplýsingar um námskeið og námskeiðskostnað eða afrit af heildarreikningi vegna námskeiðs eða þeirrar greiðslu sem kemur í hluta atvinnuleitanda sjálfs að greiða.

Umsóknareyðublað um námsstyrk má nálgast hér:  pdf-form    word-form