Verkefni fyrir frumkvöðlakonur á landsbyggðinni

Mánudaginn 31.ágúst var skrifað undir samning um verkefni Vinnumálastofnunar FREE  - Female Rural Enterprise Empowerment en verkefnið hefur fengið styrk upp á 40 milljónir úr Erasmus+ áætlun Evrópusambandsins. Verkefnið hefur það markmið að bjóða frumkvöðlakonum á þremur landshlutum að byggja upp hæfni og færni í viðskiptum og til að auka tengslanet sitt, bæði staðbundið en einnig í Evrópu.

Frá undirritun samnings FREE
Frá undirritun samnings; Gissur Pétursson, forstjóri Vinnumálastofnunar, Ásdís Guðmundsdóttir, verkefnastjóri og Ágúst Hjörtur Ingþórsson, sviðsstjóri mennta og menningarsviðs Rannís


Námsframboð fyrir þennan hóp í dreifðum byggðum er oft af skornum skammti og getur verið kostnaðarsamt að taka þátt. Boðið verður upp á fræðslu í viðskiptatengdum þáttum í fjarkennslu,  en einnig verður lögð áhersla á að byggja upp persónulega færni með því að bjóða upp á þátttöku í þjálfunarhringjum (Enterprise circles). Nýjar leiðir verða nýttar til að ná til þátttakenda sem búa á afskekktum stöðum til að tryggja aðgengi þeirra en einnig að þróa tengslanet kvenna þar sem þær geta stutt hvor aðra og lært af hvor annari. 

Markmiðið með verkefninu er að efla konur og aðstoða þær við að verða hæfari í að stofna og/eða reka sín fyrirtæki og að efla tengslanet þeirra. 
Námsleiðin verður í boði á ákveðnum svæðum í fimm löndum sem hafa orðið verst úti hvað varðar fólksflótta en á Íslandi verður verkefnið til að byrja með  í boði á Vestfjörðum, Austfjörðum og á Norðurlandi vestra.

Samastarfsaðilar FREE verkefnisins

Þeir sem fengu úthlutað úr starfsmenntapakkanum.

Samstarfsaðilar eru 7 talsins og eru eftirfarandi;
Vinnumálastofnun - Íslandi
Byggðastofnun – Íslandi
Inova ráðgjafaþjónusta– Bretlandi
CESI – jafnréttisstofnun í Króatíu
Sandanski atvinnuþróunarfélag– Búlgaríu
Kaunas atvinnuþróunarfélag - Litháen
Wire (Harpers Adams háskólinn) – tengslanet kvenna – Bretlandi

Verkefnið hófst þann 1. september næstkomandi og mun fyrsti fundur samstarfsaðila verða í Sheffield í byrjun október. Fyrsti verkþátturinn mun vera rannsókn og skoðun á stöðu frumkvöðlakvenna á landsbyggðinni en stefnt er að því að námskeiðin sjálf hefjist haustið 2016.  

Verkefnastjóri verkefnisins er Ásdís Guðmundsdóttir, starfsmaður Vinnumálastofnunar en hún veitir allar nánari upplýsingar um verkefnið. 

Hunang vefstofa Merki Hunang vefstofu

Þessi vefur notar vefkökur (e. cookies).

Sjá nánar í persónuverndarstefnu Vinnumálastofnunar.