Bótaréttur námsmanna samhliða námi

Nr. 22 - 2003

Úrskurður

 

Þann 7. apríl 2003 kvað úr­skurð­ar­n­efnd at­vinnu­leysis­bóta upp svohljóðandi úr­skurð í máli nr. 22/2003.

Máls­at­vik og kæru­efni

 

1.

Málsatvik eru þau að út­hlutunar­nefnd at­vinnu­leysis­bóta nr. 2 fyrir höfuðborgarsvæðið ákvað á fundi sínum þann 18. febrúar 2003, að hafna umsókn B um atvinnuleysisbætur. Í bréfi úthlutunarnefndar til B dags. 19. febrúar s.l. er vísað þess að B sé nemandi í Háskóla Íslands.  Í 5. gr. reglugerðar um greiðsluatvinnuleysisbóta nr. 545/1997 segi m.a. að námsmenn eigi ekki rétt á atvinnuleysisbótum samhliða námi sem stundað er á venjulegum dagvinnutíma.

 

2.

B kærði framangreinda ákvörðun til úrskurðarnefndar atvinnuleysisbóta með bréfi dags. 21. mars 2003.  Í kæru hans segist hann vera í námi við Endurmenntunarstofnun Háskóla Íslands og námið fari að mestu fram utan dagvinnutíma eða um 90%.  Hann segir að allir sem þann þekki til í þessu námi séu í vinnu samhliða náminu.   Á markaðinum ríki samningafrelsi og hægt sé að semja um þann vinnutíma sem henti.  Hann telur synjun umsóknar sinnar vera mikið óréttlæti.  

 

3.

Samkvæmt upplýsingum frá Endurmenntunarstofnun Háskóla Íslands er B skráður í rekstrar- og viðskiptanám hjá stofnuninni.  Námið tekur þrjár annir og er alls 18 einingar eða 6 einingar á önn.  Fullt nám við Háskóla Íslands er 15 einingar.  Miðað er við 8-12 klst. kennslu vikulega og heimavinna er áætluð 25-30 klst. á viku.  Samkvæmt stundaskrá fer kennslan fram alla þriðjudaga kl. 16-20, laugardaga kl. 9-13 auk þess sem kennt er nokkra föstudaga kl. 14-18.

 

Niður­staða

 

1.

Í 5. gr. reglugerðar um greiðslu atvinnuleysisbóta nr. 545/1997 er kveðið á um að námsmenn eigi ekki rétt á atvinnuleysisbótum samhliða námi sem stundað er á venjulegum dagvinnutíma, nema annað leiði af samningi um starfsleitaráætlun, sbr. 15. gr. laga um vinnumarkaðsaðgerðir.

 

            Samkvæmt þeim upplýsingum sem liggja fyrir í máli þessu er kærandi í námi í rekstrar- og viðskiptafræði við Endurmenntunarstofnun Háskóla Íslands.  Kennslan fer að einungis að smávægilegum hluta til fram á dagvinnutíma.  Að mati úrskurðarnefndar atvinnuleysisbóta eru því ekki lagaskilyrði til að synja greiðslu ativnnuleysisbóta samfara námi kæranda.  Er ákvörðun úthlutunarnefndar atvinnuleysis­bóta nr. 2 fyrir höfuðborgarsvæðið um synjun á umsókn hans um atvinnuleysisbætur því felld úr gildi.

 

 

Úr­skurðar­orð:

 

Ákvörðun út­hlutunar­nefndar at­vinnu­leysis­bóta nr. 2 fyrir höfuðborgarsvæðið frá 18. febrúar 2003 um synjun á umsókn B um atvinnuleysisbætir er felld úr gildi.

 

 

Úr­skurð­ar­n­efnd at­vinnu­leysis­bóta

 

Frið­jón Guðröðarson

for­maður

 

Árni Benedikts­son                                 Benedikt Davíðs­son

 

 

 

 

Til baka