Bótaréttur námsmanns samhliða námi.

Nr. 28 - 2003

Úrskurður

 

Þann 7. apríl 2003 kvað úr­skurð­ar­n­efnd at­vinnu­leysis­bóta upp svohljóðandi úr­skurð í máli nr. 28/2003.

Máls­at­vik og kæru­efni

 

1.

Málsatvik eru þau að út­hlutunar­nefnd at­vinnu­leysis­bóta nr. 1 fyrir höfuðborgarsvæðið ákvað á fundi sínum þann 10. mars 2003, að hafna umsókn A um atvinnuleysisbætur. Í bréfi úthlutunarnefndar til A dags. 12. mars  s.l. er vísað til 5. gr. reglugerðar um greiðslu atvinnuleysisbóta nr. 545/1997 sem kveður á um að námsmenn eigi ekki rétt á atvinnuleysisbótum samhliða námi sem stundað er á venjulegum dagvinnutíma nema annað leiði af samningi um starfsleitaráætlun, sbr. 15. gr. laga um vinnumarkaðsaðgerðir.

 

2.

A kærði framangreinda ákvörðun til úrskurðarnefndar atvinnuleysisbóta með bréfi dags. 19. mars 2003.  Í kæru hennar segist hún vera skráð í Háskóla Íslands þar sem hún útskrifist ekki fyrr en í júní 2003.  Hún hafi hins vegar lokið öllum fögum í maí 2002 og því eigi tilvísað ákvæði ekki við sig.  Hún sé að leita að fullu starfi.  

 

3.

Samkvæmt upplýsingum frá Háskóla Íslands er A skráð í 5 eininga BS ritgerð á vorönn 2003.  Hún sé ekki skráð í nein fög og því sé ekki um neina tímasókn að ræða samfara ritgerðaskrifunum.  Samkvæmt vottorði frá háskólanum dags. 28. febrúar 2003 var A skráður stúdent við skólann háskólaárið 2001-2002 í fullu námi og tók hún síðast próf á vormisseri 2002. Samkvæmt upplýsingum á atvinnuumsókn A hjá svæðisvinnumiðlun óskar A eftir fullu starfi og kveðst geta hafið störf 27. febrúar 2003 sem er sami dagur og hún sækir um atvinnuleysisbætur.   

 

Niður­staða

 

1.

Í 5. gr. reglugerðar um greiðslu atvinnuleysisbóta nr. 545/1997 er kveðið á um að námsmenn eigi ekki rétt á atvinnuleysisbótum samhliða námi sem stundað er á venjulegum dagvinnutíma, nema annað leiði af samningi um starfsleitaráætlun, sbr. 15. gr. laga um vinnumarkaðsaðgerðir.

 

            Samkvæmt þeim upplýsingum sem liggja fyrir í máli þessu er kærandi að skrifa lokaritgerð í landafræði við Háskóla íslands.  Hún hefur lokið öllum prófum og sækir enga tíma í skólanum samfara ritgerðarsmíðinni.  5. gr. reglugerðar 545/1997 hefur ávalt verið túlkuð svo að um tímasókn á venjulegum dagvinnutíma þurfi að vera að ræða svo greinin eigi við.  Þannig fellur nám sem stundað er í kvöldskóla og nám utan venjulegs dagvinnutíma utan greinarinnar.  Kærandi hefur lokið öllum fögum þar sem gert er ráð fyrir tímasókn.   Að mati úrskurðarnefndar atvinnuleysisbóta á nefnd grein ekki við um nám kæranda.  Er ákvörðun úthlutunarnefndar atvinnuleysis­bóta nr. 1 fyrir höfuðborgarsvæðið um synjun á umsókn hennar um atvinnuleysisbætur því felld úr gildi.

 

 

Úr­skurðar­orð:

 

Ákvörðun út­hlutunar­nefndar at­vinnu­leysis­bóta nr. 1 fyrir höfuðborgarsvæðið frá 10. mars 2003 um synjun á umsókn A um atvinnuleysisbætur er felld úr gildi.

 

Úr­skurð­ar­n­efnd at­vinnu­leysis­bóta

 

Frið­jón Guðröðarson

for­maður

 

Árni Benedikts­son                                 Benedikt Davíðs­son

 

 

 

 

Til baka