Niðurfelling bótaréttar í 40 bótadaga, segir upp starfi.

Nr. 55 - 2003

Úrskurður

 

Þann 23. júní 2003 kvað úr­skurð­ar­n­efnd at­vinnu­leysis­bóta upp svohljóðandi úr­skurð í máli nr. 55/2003.

 

Máls­at­vik og kæru­efni

 

1.

Málsatvik eru þau að út­hlutunar­nefnd at­vinnu­leysis­bóta nr. 1 fyrir höfuðborgarsvæðið samþykkti á fundi sínum þann 22. apríl 2003 umsókn A um atvinnuleysisbætur.  Með vísan til upplýsinga á vinnuveitandavottorði, dags 10. apríl 2003, um starfslok hennar hjá K var réttur hennar til atvinnuleysisbóta hins vegar felldur niður í 40 bótadaga í upphafi bótatímabils á grundvelli 4. tölul. 5. gr. laga um atvinnuleysistryggingar nr. 12/1997, sem kveður á um það að hafi umsækjandi um atvinnuleysisbætur sagt starfi sínu lausu án gildra ástæðna skuli það varða missi bótaréttar í 40 bótadaga.

 

2.

A kærði ákvörðun úthlutunarnefndar til úrskurðarnefndar atvinnuleysisbóta með bréfi dags. 30. maí 2003.  Í bréfi sínu segist hún hafa ráðið sig í vinnu á leikskóla þann 1. janúar 2003 og hafi sonur hennar byrjað á sama leikskóla.  Alveg frá fyrsta degi á þessum nýja vinnustað hafi henni ekki liðið vel.  Hún hafi engan veginn getað fundið sig í starfinu sem hún er þó sérmenntuð í og hefur góða reynslu í.  Hún hafi því ákveðið að segja upp vinnunni og því aðeins verið í einn mánuð á þessum vinnustað.  Hún tók þessa ákvörðun einnig vegna þess að hún ætlaði að fara að vinna fyrir sér sem dagmóðir.  Hún skráði sig á námskeið fyrir dagforeldra, lauk því námskeiði og auglýsti sig sem dagmóður með laust pláss.  Hún fékk hins vegar ekki börn í gæslu og hefur ekki fengið ennþá.  Hún hafi í raun hætt á leikskólanum til að fara að vinna við annað sem hún taldi eiga betur við sig, a.m.k. á meðan sonur hennar væri ekki eldri, og hyggst m.a. flytja í annað bæjarfélag þar sem meiri þörf er á dagmæðrum.   Í bréfi sínu segist hún eiga erfitt með að sætta sig við 40 bótalausa daga og fer hún fram á réttur hennar verði endurskoðaður.

 

 

Niður­staða

 

1.

Sam­kvæmt 4. tölul. 5. gr. laga um at­vinnu­leysis­tryggingar nr. 12/1997, veldur það missi bóta­réttar í 40 bóta­daga ef um­sækjandi um at­vinnu­leysis­bætur hefur sagt lausu því starfi sem hann hafði án gildra ástæðna.  Ákvæði þetta er skýrt nánar í 7. gr. reglu­gerð nr. 545/1997 um greiðslu at­vinnu­leysis­bóta en þar segir:  Ef um­sækjandi um bætur hefur sagt starfi sínu lausu er út­hlutunar­nefnd at­vinnu­leysis­bóta heimilt að ákveða að hann skuli ekki missa rétt til bóta, sbr. 4. tölu. 5. gr. laga um at­vinnu­leysis­tryggingar, séu starfs­lok til­komin vegna einhverra eftir­talinna at­vika:

a.         Maki um­sækjanda hafi farið til starfa í öðrum lands­hluta og fjöl­skyldan hefur af þeim sökum þurft að flytja bú­ferlum.

b.         Upp­sögn má rekja til þess að um­sækjandi, að öðru leyti vinnu­fær, hefur af heilsu­fars­á­st­æðum sagt sig frá þeirri vinnu sem hann var í, að því til­skildu að vinnu­veitanda hans hafi mátt vera kunnugt um þessar ást­æður áður en hann lét af störfum. Heimilt er að óska eftir læknis­vott­orði þessu til stað­festingar.

Kjósi út­hlutunar­nefnd að beita heimild 4. tölul. 5. gr. laga um at­vinnu­leysis­tryggingar í öðrum til­vikum en að ofan greinir, skal hún til­taka sér­stak­lega í ákvörðun sinni þau at­vik og sjónar­mið sem ákvörðun byggist á.

 

2.

Í gögnum málsins kemur fram að A starfaði sem leikskólakennari hjá K tímabilið 1. janúar 2003 til 31. janúar 2003 er hún sagði sjálf upp starfi sínu.  Að mati úrskurðarnefndar atvinnuleysisbóta teljast þær ástæður sem kærandi gefur fyrir starfslokum sínum ekki gildar í skilningi 4. tölul. 5. gr. laga um atvinnuleysistryggingar, sbr. 7. gr. reglugerðar nr. 545/1997.   Ágreiningur milli starfsmanna eða yfirmanna og starfsmanna ellegar almenn óánægja í starfi  flokkast ekki undir gildar ástæður samkvæmt framangreindum reglum. Með vísan til framanritaðs er ákvörðun úthlutunarnefndar atvinnuleysisbóta nr. 1 fyrir höfuðborgarsvæðið um niðurfellingu bótaréttar kæranda í 40 bótadaga samkvæmt 4. tölul. 5. gr. laga um atvinnuleysistryggingar nr. 12/1997 staðfest.

 

 

 

 

Úr­skurðar­orð:

 

 

Úrskurðarorð hljóðar svo:  Ákvörðun úthlutunarnefndar atvinnuleysisbóta nr. 1 fyrir höfuðborgarsvæðið frá 22. apríl 2003 um að A skuli sæta missi  bótaréttar í 40 bótadaga er staðfest.

 

 

Úr­skurð­ar­n­efnd at­vinnu­leysis­bóta

 

 

Þuríður Jónsdóttir

Formaður

 

Árni Benedikts­son                                Benedikt Davíðs­son

 

 

Til baka