pageicon

Fyrstu skrefin

Hér finnur þú stutta samantekt yfir helstu atriði er viðkemur umsókn um fæðingarorlof eða fæðingarstyrk. Ítarlegri upplýsingar um einstök atriði er að finna á heimasíðunni. Einnig er velkomið að senda fyrirspurn á netfangið faedingarorlof@vmst.is eða hafa samband í síma 515-4800 og við munum aðstoða þig með ánægju.


Fæðingarorlof

Hafir þú verið þátttakandi á innlendum vinnumarkaði í a.m.k. 25% starfshlutfalli samfellt síðustu sex mánuði fyrir fæðingardag barns eða þann tíma þegar barn kemur inn á heimili við ættleiðingu eða varanlegt fóstur getur þú sótt um sem starfsmaður og/eða sjálfstætt starfandi. 
Smelltu hér til að lesa nánar um hvað telst til þátttöku á innlendum vinnumarkaði.

Hvenær þarf að skila gögnum:

Skila þarf umsókn og fylgigögnum 6 vikum fyrir áætlaðan fæðingardag barns eða þann dag sem fæðingarorlof á að hefjast.

Skila þarf tilkynningu um tilhögun fæðingarorlofs til vinnuveitanda a.m.k. 8 vikum fyrir áætlaðan fæðingardag barns eða þann dag sem fæðingarorlof á að hefjast.

Mælt er með því að þú notir rafræn form á heimasíðunni í umsóknarferlinu. Hafir þú ekki tök á því er hægt að skila gögnum á næstu þjónustuskrifstofu Vinnumálastofnunar, senda með pósti á Fæðingarorlofssjóð, Standgötu 1, 530 Hvammstanga eða með tölvupósti á faedingarorlof@vmst.is

Gögn sem þurfa að berast:
-Umsókn um greiðslur úr Fæðingarorlofssjóði Smelltu hér til að nálgast rafrænt form á heimasíðu)
-Tilkynning um tilhögun fæðingarorlofs 
Smelltu hér til að nálgast eyðublað á heimasíðu 
-Afrit af launaseðlum síðustu tveggja mánaða.
-Vottorð um áætlaðan fæðingardag, ef við á. (Fæst hjá ljósmóður). Einnig er hægt að nálgast vottorðið inn á Heilsuveru.
-Sjálfstætt starfandi foreldri þarf að skila staðfestingu á lækkun á reiknuðu endurgjaldi, ef við á (Eyðublað 5.02 hjá Skattinum)
-Vilji foreldri nýta persónuafslátt hjá Fæðingarorlofssjóði þarf eyðublaðið „Beiðni um nýtingu persónuafsláttar“ að berast í síðasta lagi 20. dag þess mánaðar sem nýta skal hann
Smelltu hér til að nálgast rafrænt form á heimasíðu.

Hægt er að hengja fylgigögn við rafræna umsókn. Eftir að umsókn hefur verið skilað er hægt að skila viðbótargögnum með rafrænum hætti á heimasíðunni.
Smelltu hér til að nálgast rafrænt form fyrir viðbótargögn.

Vinnsla umsókna

Vinnsla umsókna tekur að jafnaði 2-5 vikur hjá Fæðingarorlofssjóði.
Þegar vinnsla umsóknar hefst fær foreldri sent bréf um það. Ef allar upplýsingar liggja fyrir fær foreldri senda greiðsluáætlun eða réttindabréf ef það ætlar að hefja töku fæðingarorlofs á fæðingardegi barns og fæðingardagur liggur ekki fyrir. Ef frekari upplýsingar vantar fær foreldri sent bréf um það.

Gott að hafa í huga

Greitt er eftir á fyrir undanfarandi mánuð. Þannig er apríl greiddur í lok apríl.
Foreldri á allaf rétt á að taka fæðingarorlof í einu lagi.
Með samkomulagi við vinnuveitanda er foreldri heimilt að skipta fæðingarorlofinu á fleiri tímabil eða dreifa því yfir lengra tímabil samhliða lækkuðu starfshlutfalli.
Ekki er hægt að taka fæðingarorlof skemur en tvær vikur í senn.
Móðir skal vera í fæðingarorlofi fyrstu tvær vikurnar eftir fæðingu barns.
Hægt er að hefja töku fæðingarorlofs allt að mánuði fyrir áætlaðan fæðingardag barns.
Réttur til töku fæðingarorlofs fellur niður þegar barnið nær 24 mánaða aldri.

Fæðingarstyrkur

Hafir þú verið í a.m.k. 75% námi á 6 mánaða tímabili síðustu 12 mánuði fyrir fæðingu barns eða þann tíma þegar barn kemur inn á heimili við ættleiðingu eða varanlegt fóstur  getur þú átt rétt á fæðingarstyrk námsmanna.
Hafir þú verið utan vinnumarkaðar eða í minna en 25% starfi síðustu sex mánuði fyrir fæðingu barns eða þann tíma þegar barn kemur inn á heimili við ættleiðingu eða varanlegt fóstur getur átt rétt á fæðingarstyrk.
Meginreglan er að foreldri hafi lögheimili á Íslandi við fæðingu barns og síðustu 12 mánuði þar á undan.
Smelltu hér til að lesa nánar um fæðingarstyrki.

Hvenær þarf að skila gögnum:

Skila þarf umsókn og fylgigögnum 3 vikum fyrir áætlaðan fæðingardag barns eða þann dag sem fæðingarstyrkur á að hefjast.

Skila þarf tilkynningu um tilhögun fæðingarorlofs til vinnuveitanda a.m.k. 8 vikum fyrir áætlaðan fæðingardag eða þann dag sem fæðingarorlof á að hefjast ef foreldri er á vinnumarkaði.

Mælt er með því að þú notir rafræn form á heimasíðunni í umsóknarferlinu. Hafir þú ekki tök á því er hægt að skila gögnum á næstu þjónustuskrifstofu Vinnumálastofnunar, senda með pósti á Fæðingarorlofssjóð, Standgötu 1, 530 Hvammstanga eða með tölvupósti á faedingarorlof@vmst.is

Gögn sem þurfa að berast:
-Umsókn um fæðingarstyrk
Smellu hér til að nálgast rafrænt form  um fæðingarstyrk á heimasíðu 
-Vottorð um áætlaðan fæðingardag, ef við á. (Fæst hjá ljósmóður). Einnig er hægt að nálgast vottorðið inn á Heilsuveru.
-Staðfesting frá skóla um að foreldri hafi verið skráð í fullt nám og staðist kröfur um námsframvindu á þeim tíma, ef við á.
-Tilkynning um tilhögun fæðingarorlofs, ef við á. 
Smelltu hér til að nálgast eyðublað á heimasíðu um tilhögun fæðingarorlofs. 
- Vilji foreldri nýta persónuafslátt hjá Fæðingarorlofssjóði þarf eyðublaðið „Beiðni um nýtingu persónuafsláttar“ að berast í síðasta lagi 20. dag þess mánaðar sem nýta skal hann í.
Smelltu hér til að nálgast rafrænt eyðublað um nýtingu persónuafsláttar. 

Vinnsla umsókna

Vinnsla umsókna tekur að jafnaði 3 vikur hjá Fæðingarorlofssjóði.
Þegar vinnsla umsóknar hefst fær foreldri sent bréf um það. Ef allar upplýsingar liggja fyrir fær foreldri senda greiðsluáætlun eða réttindabréf ef ekki er víst að barn fæðist í þeim mánuði sem áætlað er að hefja töku fæðingarstyrks. Ef frekari upplýsingar vantar fær foreldri sent bréf um það.

Gott að hafa í huga:

Greitt er eftir á fyrir undanfarandi mánuð. Þannig er apríl greiddur í lok apríl.
Fæðingarstyrk þarf að taka í einu lagi, þ.e. almennt er ekki heimilt að skipta honum á fleiri tímabil eða dreifa greiðslum.
Heimilt er að hefja töku fæðingarstyrks í fæðingarmánuði barns.
Réttur til töku fæðingarstyrks fellur niður þegar barnið nær 24 mánaða aldri.


Hunang vefstofa Merki Hunang vefstofu

Þessi vefur notar vefkökur (e. cookies).

Sjá nánar í persónuverndarstefnu Vinnumálastofnunar.