Bótaréttur sjálfstætt starfandi einstaklings.

Nr. 24 - 2003

Úrskurður

 

Hinn 7. apríl 2003 kvað úr­skurð­ar­n­efnd at­vinnu­leysis­bóta upp svohljóðandi úr­skurð í máli nr. 24/2003.

 

Máls­at­vik og kæru­efni

 

1.

Málsatvik eru þau að úthlutunarnefnd atvinnuleysisbóta á Norðurlandi vestra ákvað á fundi sínum þann 17. febrúar 2003 að synja umsókn B um atvinnuleysisbætur.  í bréfi úthlutunarnefndar, dags. 19. febrúar 2003 er vísað til þess að B sé með opið virðisaukaskattnúmer og eigi ekki samtímis rétt á atvinnuleysisbótum samkvæmt reglugerð nr. 740/1997 um bótarétt sjálfstætt starfandi einstaklinga.

 

2.

            B kærði framangreinda ákvörðun til úrskurðarnefndar atvinnuleysisbóta með bréfi dags. 5. mars 2003.  Í bréfi sínu segist hann hafa verið launþegi í 7 ár.  Hann sé með opið virðisaukaskattnúmer og hafi fengið leyfi skattstjóra til skila uppgjöri árlega.   Á árinu 2002 hafi hann skilað kr. 2.940 í virðisaukaskatt.  Hann hafi á árinu 2001 fengið greiddar atvinnuleysisbætur í tvær vikur og engar lagabreytingar hafi orðið síðan sem breyti rétti hans til atvinnuleysisbóta.

 

3.

            Samkvæmt upplýsingum úr virðisaukaskattskrá er B skráður fyrir virðisaukaskattnúmeri sem er opið.  Samkvæmt upplýsingum ríkisskattstjóra var skattskyld velta B á árinu 2002 kr. 12.000 og útskattur samtals kr. 2.940.  Samkvæmt upplýsingum B eru tekjur þessar tilkomnar vegna einnar akstursnótu.  Á árinu 2001 var skattskyld velta kr. 14.000 og útskattur samtals kr. 3.434.  Á árinu 2000 var ekki um neina skattskylda veltu að ræða.  B er ekki á launagreiðendaskrá og hefur ekki verið gert að reikna sér endurgjald vegna starfsemi sinnar.

 

 

 

 

 

Niður­staða

 

1.

Samkvæmt 1. mgr. 1. gr. laga nr. 12/1997 um atvinnuleysistryggingar eiga launamenn og sjálfstætt starfandi einstaklingar sem verða atvinnulausir rétt á bótum úr Atvinnuleysistryggingasjóði samkvæmt því sem mælt er fyrir í lögunum enda séu þeir í atvinnuleit og fullfærir til vinnu.  Í 2. mgr. 1. gr. er félagsmálaráðherra veitt heimild til að setja nánari reglur um hvaða skilyrðum sjálfstætt starfandi einstaklingar skuli fullnægja til að njóta bóta úr sjóðnum  Í reglugerð nr. 740/1997 um bótarétt sjálfstætt starfandi einstaklinga úr Atvinnuleysistryggingasjóði er hugtakið sjálfstætt starfandi einstaklingur skilgreint með eftirfarandi hætti, sbr. 1. gr.; sá sem starfar við eigin rekstur, án tillits til félagsforms, í því umfangi að honum eða félagi er gert að standa mánaðarlega, eða með öðrum reglubundnum hætti samkvæmt ákvörðun skattyfirvalda, skil á tryggingagjaldi. Í 6. gr. reglugerðarinnar segir orðrétt:

 

Sam­kvæmt gögnum þessa máls byggir kærandi um­sókn sína um at­vinnu­leysis­bætur á vinnu sinni sem laun­a­maður.  Að mati úrskurðarnefndar er ekki tilefni til að líta svo á að kærandi hafi starfað sem sjálf­s­tætt starf­andi einstaklingur í skilningi 1. gr. reglu­gerðarinnar.  Það að kærandi hafi haft kr. 12.000 í tekjur á árinu vegna einnar akstursnótu þykir að mati úr­skurð­ar­n­efndar ekki jafn­gilda því að líta beri á kæranda sem sjálf­s­tætt starf­andi einstakling í skilningi 1. gr. reglu­gerðarinnar.  Með vísan til framanritaðs þykir sú stað­reynd að kærandi er skráður með virðis­auka­skatts­númer ekki réttlæta synjun á um­sókn hans um at­vinnu­leysis­bætur. Með vísan til alls framan­ritaðs er ákvörðun út­hlutunar­nefndar at­vinnu­leysis­bóta fyrir Norður­land vestra í máli B felld úr gildi.

 

 

Úr­skurðar­orð:

 

            Ákvörðun út­hlutunar­nefndar at­vinnu­leysis­bóta fyrir Norðurland vestra frá 17. febrúar 2003 um synjun á umsókn B um atvinnuleysisbætur er felld úr gildi.         

Úr­skurð­ar­n­efnd at­vinnu­leysis­bóta

 

Frið­jón Guðröðarson

for­maður

 

Árni Benedikts­son                                             Benedikt Davíðs­son

Til baka