Bótaréttur námsmanna samfara námi.

Nr. 25 - 2003

Úrskurður

 

Þann 17. mars 2003 kvað úr­skurð­ar­n­efnd at­vinnu­leysis­bóta upp svohljóðandi úr­skurð í máli nr. 25/2003.

 

Máls­at­vik og kæru­efni

 

1.

 

Málsatvik eru þau að út­hlutunar­nefnd at­vinnu­leysis­bóta nr. 1 fyrir höfuðborgarsvæðið ákvað á fundi sínum þann 24. febrúar 2003, að synja umsókn A, dags. 31. janúar 2003,  um atvinnuleysisbætur. Í bréfi úthlutunarnefndar til A, dags. 28. febrúar s.l. er vísað til þess umsókn hennar sé hafnað samkvæmt lögum um atvinnuleysistryggingar nr. 12/1997 þar til hún hafi lokið B.S. ritgerð og skilað kvittun þar um.

 

2.

 

A kærði framangreinda ákvörðun til úrskurðarnefndar atvinnuleysisbóta með bréfi dags. 5. mars 2003.  Í bréfi sínu segist hún vera skráð í Háskóla Íslands í B.S. ritgerð.  Fullt nám sé 15 einingar.  Ritgerð þessi sé einungis 5 eininga áfangi en hún muni ekki útskrifast fyrr en í júní 2003.  Í gegnum tíðina hafi hún ávallt verið í skóla, vinnu eða hvoru tveggja og greitt skatta og lífeyrissjóðsiðgjöld frá því hún var unglingur.  Hún vonast til að úrskurðarnefndin endurskoði mál sitt..

 

3.

 

Samkvæmt upplýsingum frá Háskóla Íslands er A skráð í 5 eininga BS ritgerð á vorönn 2003.  Hún er ekki skráð í nein fög og því er ekki gerð krafa um neina tímasókn samfara ritgerðaskrifunum.  Samkvæmt vottorði frá háskólanum dags. 3. febrúar 2003 var A skráður stúdent í fullu námi við skólann háskólaárið janúar-desember 2002 og lauk tímasókn í desember 2002.  Samkvæmt upplýsingum á atvinnuumsókn A hjá svæðisvinnumiðlun óskar A eftir fullu starfi og kveðst geta hafið störf 31. janúar 2003 sem er sami dagur og hún sækir um atvinnuleysisbætur.   

 

 

 

Niður­staða

 

1.

 

Í 5. gr. reglugerðar um greiðslu atvinnuleysisbóta nr. 545/1997 er kveðið á um að námsmenn eigi ekki rétt á atvinnuleysisbótum samhliða námi sem stundað er á venjulegum dagvinnutíma, nema annað leiði af samningi um starfsleitaráætlun, sbr. 15. gr. laga um vinnumarkaðsaðgerðir.

 

            Samkvæmt þeim upplýsingum sem liggja fyrir í máli þessu er kærandi að skrifa 5 eininga lokaritgerð í leiðsögumanna- og ferðamálanámi við Háskóla íslands.  Hún hefur lokið öllum prófum og sækir enga tíma í skólanum samfara ritgerðarsmíðinni.  5. gr. reglugerðar 545/1997 hefur ávalt verið túlkuð svo að um tímasókn á venjulegum dagvinnutíma þurfi að vera að ræða svo greinin eigi við.  Þannig fellur nám sem stundað er í kvöldskóla og nám utan venjulegs dagvinnutíma utan greinarinnar.  Kærandi hefur lokið öllum fögum þar sem gert er ráð fyrir tímasókn.   Að mati úrskurðarnefndar atvinnuleysisbóta á nefnd grein ekki við um nám kæranda.  Er ákvörðun úthlutunarnefndar atvinnuleysis­bóta nr. 1 fyrir höfuðborgarsvæðið um synjun á umsókn hennar um atvinnuleysisbætur því felld úr gildi.

 

 

 

 

 

 

 

 

Úr­skurðar­orð:

 

            Ákvörðun út­hlutunar­nefndar at­vinnu­leysis­bóta nr. 1 fyrir höfuðborgarsvæðið frá 24. febrúar um synjun á umsókn A um atvinnuleysisbætur er staðfest.         

 

Úr­skurð­ar­n­efnd at­vinnu­leysis­bóta

 

Frið­jón Guðröðarson

for­maður

 

Árni Benedikts­son                                            Benedikt Davíðs­son

 

Til baka