Umsókn um alþjóðlega vernd
Sótt er um alþjóðlega vernd hjá Útlendingastofnun eða lögreglu. Eftir að lögregla hefur skráð grunnupplýsingar, tekið fingraför, rannsakað ferðaleið og auðkenni, sendir lögregla umsóknina þína til Útlendingastofnunar til frekari vinnslu og ákvarðanatöku.
Meðan umsókn er til afgreiðslu hjá Útlendingastofnun útvegar Vinnumálastofnun húsnæði og grunnþjónustu. Í grunnþjónustu fellst t.a.m.:
- Læknisaðstoð
- Skólaganga
- Almenningssamgöngur/strætó innan sveitarfélags
Vinnumálastofnun er með samninga við félagsmálayfirvöld í Hafnarfirði, Reykjanesbæ og Reykjavík um að útvega húsnæði og grunnþjónustu f.h. stofnunarinnar.
Spurningar og svör
Þjónustuviðtal
Ef þig vantar upplýsingar eða þarft aðstoð þá geturðu mætt í þjónustuviðtal. Upplýsingar um tímasetningar þjónustuviðtala færðu í þínu búsetuúrræði.
Í þjónustuviðtali færðu m.a.
- Framfærslukort
- Aðstoð við að panta læknistíma
- Aðstoð við að panta tíma hjá sálfræðingi
- Farmiða í almenningssamgöngur
- Úrlausn af fyrirspurnum af ýmsu tagi
Húsnæði
Allir umsækjendur hefja búsetu í tímabundnum úrræðum Vinnumálastofnunar nema þeir kjósi að búa á eigin vegum. Búsetuúrræði á vegum Vinnumálastofnunar eru flest á höfuðborgarsvæðinu og Suðurnesjum. Öryggisvörður tekur á móti þér í búsetuúrræðinu og úthlutar þér herbergi, lykla og fer yfir húsreglur. Öryggisverðir í búsetuúrræðum Vinnumálastofnunar starfa allan sólarhringinn og því er ávallt hægt að leita til þeirra í bráðatilfellum.
Framfærsla
Umsækjendur um alþjóðlega vernd eiga rétt á vikulegum fæðispeningum. Skilyrði fyrir greiðslu fæðispeninga eru m.a. að viðkomandi búi ekki í húsnæði sem fylgir fæði, mæti í viðtöl og birtingar sem hann hefur verið boðaður til og gangist undir að fylgja þeim umgengnisreglum sem gilda í búsetuúrræði.
Fæðispeningar eru greiddir vikulega á greiðslukort sem umsækjandi fær til umráða. Upphæð er breytilegt eftir fjölskyldustærð.
Engin fjölskylda fær meira en 28.000 sama hver stærð fjölskyldunnar er.
Heilbrigðisþjónusta
Sem umsækjandi um alþjóðlega vernd áttu rétt á nauðsynlegri heilbrigðisþjónustu og lyfjum sem eru þér nauðsynleg á meðan mál þitt er til meðferðar hjá íslenskum stjórnvöldum. Önnur læknisþjónusta, svo sem tannlækningar eða aðgerðir sem ekki er brýn þörf á, standa utan þeirrar þjónustu og verður ekki veitt nema að undangengnu mati trúnaðarlæknis Vinnumálastofnunar.
Göngudeild sóttvarna á Egilsgötu 3, 101 Reykjavík sinnir fyrstu læknisskoðun fyrir umsækjendur um alþjóðlega vernd. Í þjónustunni felst meðal annars nauðsynleg heilbrigðisþjónusta, skimun fyrir smitsjúkdómum og áfallastreituröskun, sálfræðiþjónusta og bólusetningar.
Almenn læknisþjónusta og mæðra og ungbarnavernd fer svo fram á heilsugæslu nálægt þínu búsetuúrræði. Eftir fyrstu læknisskoðun skaltu leita í þjónustuviðtöl Vinnumálastofnunar til að óska eftir læknistíma.
Fyrsta læknisskoðun
Samkvæmt viðmiðunarreglum sóttvarnarlæknis er öllum umsækjendur um alþjóðlega vernd skylt að gangast undir læknisskoðun við komu til landsins. Fyrsta læknisskoðun fer fram á fyrstu vikum eftir komu, hvort sem um er að ræða barn eða fullorðinn einstakling. Vinnumálastofnun bókar tíma fyrir þig í fyrstu læknisskoðun. Athugaðu að Vinnumálastofnun hefur heimild til að skerða þjónustu ef þú mætir ekki í fyrstu læknisskoðun.
Í fyrstu skoðun mun læknir meta heilsufar þitt og veita viðeigandi meðferð ef á þarf að halda. Þá er lögð áhersla á skimun vegna smitsjúkdóma og annarra sjúkdóma auk þess að skimað.
Sálfræðiþjónusta
Umsækjendur um alþjóðlega vernd eiga rétt á sálfræðiþjónustu. Umsækjendur sem upplifa einkenni áfallastreitu, þunglyndis og kvíða eru sérstaklega hvattir til að leita sér aðstoðar sálfræðings. Þú getur óskað eftir sálfræðiþjónustu í þjónustuviðtali hjá Útlendingastofnun og einnig hjá Vinnumálastofnun.
Sálfræðiviðtöl fara flest fram á Göngudeild Egilsgötu 3, 101 Reykjavík en í sumum tilfellum er leitast eftir öðrum fagaðilum sé það metið svo.
Rauði krossinn
Rauði krossinn veitir umsækjendum um alþjóðlega vernd þjónustu í formi félagslegs stuðnings ásamt félagsstarfs. Félagslegur stuðningur felst í að draga úr félagslegri einangrun, auka virkni fólks og ýta undir þátttöku þess í íslensku samfélgi á meðan beðið er úrlausn sinna mála.
Félagslegur stuðningur
Rauði krossinn býður upp á viðtalstíma fyrir umsækjendur um alþjóðlega vernd vikulega. Tilgangur tímanna er að skapa vettvang fyrir umræður um mál sem liggja umsækjendum á hjarta, hvort sem þau snúa að félagslegum þáttum, andlegri líðan eða tengslum við fjölskyldu í upprunaríki. Í viðtalstímum er boðið upp á túlkaþjónustu í gegnum síma svo allir geta tjáð sig óhindrað. Þjónustan er veitt á forsendum umsækjenda og hefur verið sem næst búsetuúrræðum fólks með auðvelt aðgengi að leiðarljósi.
Viðtalstímar Rauða Krossins
Viðtalstímar fara fram á eftirfarandi tímum:
Reykjavík
Miðvikudagar kl 12-15
Árskógar 4
Strætisvagnastöð: Mjódd
Keflavík
Fimmtudaga kl 12-15
Smiðjuvellir 8
Strætisvagnastöð: Fjölbrautarskóli
Sími: 570 4000
Netfang: asylum@redcross.is
Félagsstarf
Félagsstarf umsækjenda um alþjóðlega vernd býður skjólstæðingum og sjálfboðaliðum vettvang til að skipuleggja viðburði og verkefni með valdeflingu og virka þátttöku að leiðarljósi. Markmiðið með félagslegum stuðningi við umsækjendur um alþjóðlega vernd er að þjónusta skjólstæðinga og bjóða þeim upp á félagsleg úrræði, virkni og tengingu við nærsamfélagið, en ekki síður að vekja almenning til vitundar og hvetja til þátttöku.
Starfið er fjölbreytt og fjölmargir hópar hittast í viku hverri, þar með talið kvennahópur og ungmennahópur, en einnig er haldið opið hús. Auk þess er bæði íslenska og enska kennd. Félagsstarfið fer fram í Árskógum, á Vitatorgi og Smiðjuvöllum Reykjanesbæ. Dagskráin breytist reglulega en hana má finna í gegnum þennan hlekk:
Information for Asylum Seekers in Iceland on Facebook
*Upplýsingar teknar af heimasíðu Rauða Krossins www.raudikrossinn.is
Atvinnuleyfi
Ef þú er umsækjandi um alþjóðlega vernd á Íslandi geturðu sótt um bráðabirgða dvalar- og atvinnuleyfi á meðan umsókn er til meðferðar. Slíkt leyfi myndar ekki grundvöll fyrir ótímabundnu dvalarleyfi og er háð ákveðnum skilyrðum. Leyfið er einungis veitt sem tímabundið úrræði þar til endanleg niðurstaða liggur fyrir í máli þínu.
Verði umsókn samþykkt hafa umsækjendur ekki lengur rétt á búsetuúrræði á vegum Vinnumálastofnunar.
Til að sækja um bráðabirgða dvalar- og atvinnuleyfi þarf að leggja fram:
- Umsókn um bráðabirgðadvalarleyfi, í frumriti, vel útfyllt og undirrituð af umsækjanda.
- Umsókn um atvinnuleyfi vegna sérstakra aðstæðna, í frumriti og undirrituð af umsækjanda og atvinnurekanda og staðfest af viðeigandi stéttarfélagi.
- Ráðningarsamning sem nær lágmarksframfærslu. Samningurinn þarf að vera í frumriti og undirritaður af umsækjanda og atvinnurekanda.
- Greiðslukvittun fyrir afgreiðslugjaldi, sjá upplýsingar um greiðslu afgreiðslugjalds. https://island.is/s/utlendingastofnun/afgreidslugjald
- Annað sem þarf að liggja fyrir svo hægt sé að afgreiða umsókn:
Sjúkrakostnaðartrygging. Umsækjandi þarf að leggja fram staðfestingu tryggingar sem gildir jafn lengi og bráðabirgðadvalarleyfið frá tryggingafélagi með starfsleyfi á Íslandi.
Umsækjendur sem eru í málsmeðferð samkvæmt Dyflinnarreglugerðinni þurfa að hafa verið á landinu í þrjá mánuði áður en þeir geta sótt um atvinnuleyfi. Útfylltum umsóknum skal skila til Útlendingastofnunar sem kemur umsókn áfram til Vinnumálastofnunar.
