Greiðslur í sóttkví

Vinnumálastofnun annast framkvæmd laga um tímabundnar greiðslur vegna einstaklinga sem sæta sóttkví. Markmið laganna er að styðja atvinnurekendur sem greiða launamönnum sem sæta sóttkví laun þegar önnur réttindi, s.s. veikindaréttur samkvæmt kjarasamningum, eiga ekki við. Með þessu móti er stefnt að því að einstaklingar geti fylgt fyrirmælum heilbrigðisyfirvalda um sóttkví án þess að hafa áhyggjur af afkomu sinni.

Lögin taka til greiðslna til atvinnurekenda sem greitt hafa launamönnum sem sæta sóttkví laun á tímabilinu frá 1. febrúar 2020 til og með 31. desember 2022. Launamenn sem hafa sætt sóttkví en hafa ekki fengið greidd laun frá atvinnurekanda sínum fyrir þann tíma geta einnig sótt um greiðslur á grundvelli laganna. Auk þess geta sjálfstætt starfandi einstaklinga sótt um greiðslur. Umsóknir um greiðslur skulu berast Vinnumálastofnun fyrir 31. mars 2023. Eftir þá dagsetningu fellur réttur til greiðslu niður.

Skilyrði fyrir greiðslum

Skilyrði fyrir greiðslum eru m.a. að einstaklingur hafi sannanlega verið í sóttkví samkvæmt beinum fyrirmælum heilbrigðisyfirvalda og að hann hafi ekki getað sinnt vinnu að hluta eða öllu leyti þaðan sem hann sætti sóttkví. 

Greiðslur frá VMST taka einungis til tilvika þar sem einstaklingur sætir sóttkví, en ekki einangrun. Frá þeim tíma sem einstaklingur greinist með  COVID-19 telst hann skráður í einangrun. Samhliða því tekur almennur veikindaréttur starfsmanns við. 

Umsókn miðast við fjölda daga sem aðili sætti sóttkví að frádregnum þeim dögum sem starfsmaður gat sinnt vinnu sinni þaðan sem hann sætti sóttkví. 

Til að finna út fjárhæðir greiðslna fyrir hvern dag skal miða við 30 daga í mánuði.

Almennt þarf ekki að skila vottorði vegna sóttkvíar nema í tilvikum þar sem barn á forræði starfmanns sætti sóttkví. Hægt er að sækja vottorð á vef Heilsuveru.

Umsókn um greiðslur í sóttkví

Athugið að hægt er að sækja um greiðslur í sóttkví eftir 15. dag næsta mánaðar eftir að sóttkví lauk.

Launþegar og sjálfstætt starfandi einstaklingar sækja um um greiðslur  á mínum síðum atvinnuleitanda. Atvinnurekendur sækja um greiðslur í gegnum mínar síður atvinnurekenda. Atvinnurekendur sem ætla sér að sækja um greiðslur þurfa því að verða sér úti um Íslykil eða rafræn skilríki fyrir atvinnurekstur sinn. Það mun auðvelda og tryggja öryggi við skil á upplýsingum sem atvinnurekendur munu þurfa að senda Vinnumálastofnun. Hér má nálgast upplýsingar um Íslykil, sjá https://vefur.island.is/islykill/, eða rafræn skilríki, sjá https://www.skilriki.is/

Spurt og svarað vegna greiðslna í sóttkví

Vantar þig svör við spurningum í tengslum við greiðslur í sóttkví. 

Smelltu þá hér. Við höfum safnað saman spurningum og svörum sem gæti komið þér að góðum notum. 

Fyrirspurnir vegna umsókna má senda á sottkvi@vmst.is

Hér að neðan  má finna leiðbeiningar hvernig unnt er að fylla út rafræna beiðni um endurumfjöllun fyrir atvinnurekendur og hins vegar launþega og sjálfstætt starfandi einstaklinga.